cerpen mandailing : HITA PUNA DOON SUDE

Anakna : Assalamu alaikum
Udana : waalikum salam. Bo maro ho langa amang namangarantoi?

 Anakna : Olo uda,aha do karejo ni uda i ?
Udana : Onbo mangalehen panganon ni gulaen ta on.
Anakna : Jadi tobat ni uda ma sudeon tu ujungan..?
Udana : Olo mang, tai ulang dokon tobat ku sajo on !
Anakna : Anggo songoni olat nidia do tobat ni uda ?
Udana : alaaa..le amang on sude tu ujungan nabana mai tobat ta do on, ido na umaksud mangarti doho.
Anakna : Mangarti uda..
Udana : Anggo songoni kehe majolo panaek arambir ta an ,paijur jolo sude namatobang i, laos mijur ko buot di hita naposo, so ualap jolo tubagas es batu dohot gulo.
Anakna : Jadima uda, naposo piga biji do didabu uda?
Udana : Anggo naposo ulang dabu, sanga pigama natarlauskon mu pala turun
Anakna : Oke,,lah kalau begitu

Songoni ma mulo ni carito, anggo dung onok iba inda marsiulangan/marsiliginan di namarkoum bahat do manombo sala tutur, bahat parubahan, bahat muse carito-carito na so botul dohot na botul. Onpe ima na tarjadi disi 'djamangkutur ("udana" dohot 'sikuroddal "anakna")  jadi sapetona dabo alai nadua dokonon sapangkek do umur nia alai, tei benna djamangkutur namenekna anggi ni ayah sikuroddal ima so maruda doma ia. Pendek na tobangan pitu bulan ma ia djamangkutur pado sikuroddal.

Udana : matarpaijur koma arambir i ?

Anakna : tos sude tinggal mutik na doma uda iginjang

Udana : illallaaah, langa maonok ma inda mangan arambir poso ho ?
Anakna : inda tarpangan arambir poso anggo dikota an dabo uda

Udana : oban ma tusopo nai i pinggir dalanan so ita sotop

Anakna : main da

Jadima alai pesta arambir poso (es kelapa muda) ningroa ngana anak doho uda alai namar dongan i. Rupana ma tolu taon ma alai inda pasuo, di natolu taon i mabahat ma parubahan ni djamangkutur, ima sannari tobat, saba, lombu dohot motor nia pe ma adong, tarlobi-lobi lima bulan dope ia dung marripe. Sikuroddal tong baya matolu taon mangaranto inda na adong dapot ia sanga aha, hum na handphone Nookia maia sada tambana namulak i dicaku ni tas nia i

Udana : mapasuo maho dohot inanguda mu Kuroddal ?

Anakna : inda pe uda ! Tei ben naget pasuo ma dohot nanguda, isuru umak ro tuson
Udana : imada naget ro nai mei, patukarkon solopku dei tu poken

Anakna : solop aha langa jabat uda
Udana : Crocodile merk na, nautobusi natuari rupa na dua rupo nomorna ,he,hehe,,

Anggo di pikiran si kuroddal ise do langa alakna inanguda on, jeges do ro ai,  ampot na lomlom do songon umak na ningroa nia sajo ma. Salose ma halai napesta minum aek ni arambiri, les marcarito tu carito ma alai inda lupa nian laos ipatik sigaret Paanamas i, benna juguk adop dalan i ma alai dat-dat adong ma motor namangkalakson.

Anakna : asal uida lewat motor narata manjou do uida tu uda ise langa i ?
Udana : Ooo.. Motor ta masude amang i
Anakna : sudeee,,?
Udana : olo, jadi so udokon ma diho mang, nangkon ko kehe be mangaranto, homa pature usahontaon deba
Anakna : anggo songoni rado au bai uda
Udana : dungi soibotoho amang on sude hita puna do sude on, mulai ngon topi ni saba ni mamakmu si dukkilan sampe tuuu bargot ni djagulo an sabanta mai
Anakna : aa..aa. Ahadope na uda
Udana : pokok na aha sajo sude na adong ida ho sude hita do nampuna nai, lain na “sada i."

Pas salose idokon djamangkutur obar nia tu si kuroddal, soma motor narata turun ma sewana dadaboru, amana jogi pardalan na, pakean na ama deges, pardeges na songon bintang film india, Mirip-mirip Karina Kapoor Mantong, Anggo mata sikuroddal tong inda sala ligi maitanda nia marupa

Anakna : naget tudia do si Oneng uda i ?

Udana : huuss Onma na udokon i da Lain ni i "sude hita puna”, anggo on khusus uda maia ampuna ni on

Anakna : jadi i ma nanguda i, aso nga tibu idokon uda langa na si oneng do na dibuat kon ni uda ..!

Laos manetek ma ilu si kuroddal manopot kon nanguda nia manjalang na tei anggo si oneng senyum ma ia laos idokon ia ma asok

Oneng : ulang ko tangis bang, au totop do I LOVE YOU

Kuroddal : bisa dope langa i... ?

Oneng : do'ah kon copat mate uda mu

Kuroddal : Aaamiin., kutunggu janda mu nanguda

OLEH : BG. ABDUL HADI RANGKUTI
EDITOR: MAHDIAN TAMIN RANGKUTI