SONADONG TANO PARSITIJURAN | Cerita di Jambur, Panyabungan, Mandailing

Dibagas pantar tano nailapisi dohot amak amparan, diborngin niari isuru umak ma ami paomabang amak bayuon anso ulang mangali tu pala modom. ipar jejerkon ma bantal nalapuk apasna, songoni sarung bantal na madung marpeta, karung topung naiparkirimi ni abang hadi sian jakarta ima di parjaiti umak soadong ulos modom. bope madung tonga borngin ayah lek nailopo dope mangopi.

mulak mangaji au dohot abang bayo angkon na torusdo tu bagas, anggo dung tarpodom umak, nagkon harap be masuk tubagas,  inda ami sajo, tu ayah pe dapotan juo doi ngamasuk bagas ibaen umak. isude anso mangapil parsiajaran sikola songoni pature PR ancogot, songoni ayah anso cepat ngot so kehe sumbayang subuh.

Sambil manjaiti pakean nami namasubak, mambaca-baca sholawat ma umak mangawasi ami namarsiajar, pala marlagu-lagu assalamu'alaikum kasidah ni alak umak najolo waktu sikola arab. pala manombo lagu tanggal 12 diari sinayan. sambil manangion lagu ni umak iba pe pature PR niba me di torangi lampu tellong-tellong, baen tagi ni lagu ni umak i le baya. kadang  lampui doma marsiajar pala tarsunggul iba. ma maosok obuk

Inilah ayah dan umak sang juara satu sedunia mengasuh,merawat,membesarkan lima anak laki-laki

inilah anak-anak ayah dan umak lima lelaki yang slalu patuh kepda kedua orangtuanya pemilik nama grouf Raybers5, artinya ; rangkuti 5 bersaudara.

Pala giot modom na biasaan au dot sikodir marsapa-sapa tu umak sanga bia ami dompak menek2. Parompa naburuk naiuloskon nisi kodiri pe parompa ni abang bayo dopei dompak di anggun najolo, pala topet ma caritoi tu au dompak di kandungan dope ning umak, mancit ma mata ni umak nararan, lobi sarara ni jambu erang. Dungi anggo di bandingkon tu alak abang adi dot abang bayo lobi borat dope au apa lagi antong sie kodir dohot sie irham, napedong nabisa mangkalahkon ni, jadi dung lahir ma au pandokon ni umak, memang godang mok-mok sibukna lom-lom buse sagalo goar marsidokkon halak naro mangabinna tu bagas marjop ni roha, adong namandokkon sie bayoibul, iabin nasada mandokkon sie kobu-kobul, robuse nasada sie mok-mok, adong juo sie godang, jadi sagalo nagodang ma diparlokotkon ma tu au goari, naterakhir keren saotik halakna namangabin aui, ningrangku alak jakarta die najolo, sanga jungada ia kehe tujakarta bope namarmayam tu bagas ni anak nia di sadun, idokkon ia muse ma nagendut, inda kalah pambaen nisi jait goni parjagal naiparik nibagas nami i, harani terobsesi manonton TVRI layar hitam putih acara tinju, Mike Tyson buse ma nia goarna  baen nagodang lom-lom i. sainggok ni goar naipardokkonan ni, pemenangna umak-umak na tarkotai rohana sotik jadi igoar-goar ma si "GENDUT" hingga sekarang kini.

Tai nasedih na ning umak pas lahir au, inda tola umak manyusui au, harana adong panyakit tarpangan ni umak, nadapot di pangajian waktu mar jeda di wirid yasin ari jum'at pukulopat  do rutin ni i, pandokon ni datu di panganon ni umak i ma di baen halak namar hianat tu umak rasa alias racun. Harani i antong adong ma umak-umak na lom-lom kulitna pondok jat muse rupona tapi denggan rohana, ia ma manyusui au sampe malum panyakit ni umak, tardokon inda manyusu au dompak menek tu umak pandokon ni bidan bisa jadi manular tu anak na di susui i. Jadi sapulu halak ami markamaranggi au maia na adong ibu susuna songon rasulullah SAW."""cuit-cuittt wit.

"Pala au bia de umak dompak menek", ning sikodirma buse. " Anggo ho antong baya pas lahir, mulai ma inda marjagal kita be. "Nasial i" ningku. Enek ma roa nisi kodir." bagas pe ma di gadeon ayahmu tu bank pambayar ni hutang, tiop hari ro alaki gon kantor managihna. jadi habis sude ngadong be baya. ima so pindah kita tu bariba dalan di lambung kuburanan , bagas ginjang, tingkap kaco naiongkos. Tai dompak ipagulung umak maho modom, tarpodom musema umak, ro mai  tiop borngin sigendut manggeserko tu topi, i pagulung ia muse ma digulunganmi di tangan ni umak. Pala tarsunggul iba dabole, ben borat ni ulu nagodang antong, ampe ma sigendut manyusu".  Martata ma ami pala mambege carito ni umak naonan.

Unjung buse dope ning umak dompak  di ompa dope au jadi sie kodir ngapedo lahir apalagi sie irham songoni sie hasan-husein, ning umak " dompak kehe mangulangi nenekmu tu jamburon sian janjimanaon, natangis sajo karejo ni sigendut, ulang so motor i, anggo ia lek natangis, mai kipasan inda juo, sude alak nai bagasan ni motori jadi marorot pasib na inda juo, ibo dma roa nialak di iba, sondia mentong alak na naek turun, giot nia ulang so motori sian huta tu jambur, ma lalu anggo ia lek tangis dope, borat na jadi mangompa ia godangna illallah natahe do boto, manangkokkon sian topi dalan lopo umak bojai  tu doloko, hum nai payakkon boban dibagas ninenekmi baen na di saba lombang di pariki antong tusi doma itopotkon nenekmu, abangmu sie bayo jou-jou mai sian lerengi mangida nenekmu di lupaki, anggo sie gendut lek natangis dung lalu di gadui ida nenek mu mantong ami naroon, lek inda juo sip natangison, milas ni ari, lojana, inda bedabe pussss" u rambankon tu lupaki sollop ului tu ombik i baru sip natangisi, marlojong ma baya nenekmu manjolokina, "owiiiiii paompungkon baya ning nenekmu manjorit-jorit.di jolokinama i basu ia tu bondari marparompa-parompa. Baru modom. Ianggun etekmu di sopo sabai. Angkkentong ngara sip". Ning umak, mar tata muse ma ami...

Marningot mau waktu menek di bagas pusako ni ompung na diwariskon tu ayah, ima naidokkon ni umak i naigadeon di ayah tu bank sampe disita, mulai sian i mantak ma ami marjagal guleon songoni dahanaon, nasattak lakuna jagal ni umak i harana sakampungi jagal ni umak dope nalumayan lengkapna keperluan dapur ni halak. Bope pandokon ni umak waktu marjagal panganon, tapi au dohot abang bayo inda pola congok mangabisi jagali, sasa limper ma dipalugut umak untung ni jagal, so adong balanjo ni abang hadi nasikola pesantren di darul ikhlas dalan lidang, bope dalan manggadisi dibaen ayah dohot umak  asal lalu ia nasikolai, tapi malang ni untung mantak juo do ia naasikolai pas di kalas lima, tai i sude ning umak harani inda sabar. Jot-jot kehe ia tu jambur padang matinggi manolongi nenek mancetak mangguris, jadina itandai ia tabo ni namarepeng nagohok, songoni pala ro ayah pataru balanjo na tu sikolaan, isapai dongan-dongan saombar ni podok na, rupa makehe mar guru silat tu luar kampung, ima mambaen sikola nia masega. Painte-inte indahan masak somangan manyogot baru berangkat tu kobun baen ari minggu, harana naron giot marangkat tu kobun tanaon giot marbabo. Roma abang tondang anak ni etek na dohot ami mulai menek, di ajak ia ma au dohot abang bayo manangkup-nangkup manuk naiambungkon ia tu tu ginjang " ise mandapotna ulehen epeng" baen marepeng ia tuor ni tanaon, ngabedabe nai baen ma pangomoan tu anggi naduaon soilehen marabur soulang biasa mambuati panganon tu jagal ni umak i, ompotma manuki malo terbang tu ginjang ni tarupi ro ma abang bayo ibuat ia ma tangga itiop abang tondang ma sian toru tanggaon, dung lalu ang bayo tuginjang marsitiop maia di bibir ni seng namadung aratoni, laos mangayak-ayak manuki soturun, pala terbang ma manuki adop ia, ikaisna mukoi margaris marmudar, bo tangis laos turun. "Namangua die" ro ma umak sian dapur matubek-bek iambangna namar badai sanga naijahati abang tondang, rupana baen nai kais manuk do muko gara-gara epeng.

 Pala manyogot ari, ro ma kk lenni dot kk siti boru ni tua' rofi'i abang ni ayah mangalap au paridina di sumbur nialai i, baru ibaen badakna apal songon buran, surina lipung, ben naso adong alai alak lai jadi baju-baju waktu menek ipakeon ma tu au, pake baju namartingkat-tingkati rok na. Dung mar baju kehe mei marlojong tu dalan montir di alamani manari-nari manganggarkon baju cantikon sambil mangolat-olati alak nakehe sikola SD. Martata-tata mala umak, tua', nanguda, nattulang palagi topet ro tobang ani. "Ooo sirit niamamu ishak" ise dobaya mambaen ko sononon, ninname laos di takkupna baru di umma sampe abis badak nai, ipe dung ipalua tobang tangis mai marlojong tu alak kk lenni harani abis badak, "ulakko tangis, abis ma badak mi, ille baya anggikkon" ninna mai, robuse kk siti," ise langa nakkin anggi, tobang, uh," laos i ilapkonma tangani arah tobang seolah mandopak tobang. Baru sip, anggo inda songoni dua jom pe tahan natangis.

Abang hadi pe nia jungada do songoni marsakna waktu marorot au. Umak kehe mamasu abit manyogot dope mulai rambon dope arii sampema tonga pitu lek ngape ro, giot tangis doma abang adi pasip au natangis mulai nakkin, baen na ro doma alak tu aek lewat sian samping ni bagas i ibege ia juo. Idokkonama tu umak natangis sajo sie gendut di bagas, inda tar pasip sie adi. Iompoti umak doma sian aek namamasui i, rupana baen namanguas do lombam domantong mukoi natangisi sajo, marbulinat.

Badan namok-mok borat na jadi, ima tompion ni abang hadi dot abang tondang margotti-gotti tu kobun tanaon sian uta lewat gon parik sikola SD i, manyiborangi aek sababale baru manangkok tu dolokan giot manajak par lasiakan di kobun tanaon, tajak godang dot tajak menek nabaru ilayan dope manyogoti dope ialap sian panitipan. Ayah dohot umak muloima manajak au pe ujoloki  ma tajak naipili ni abang tondang dompak juguk-juguk alai di sopo, abang bayo antong karejona manganggun di kodir ma isopoi soulang ipangan rongit. Bope madung ipagara ayah sabut nai oban ni abang tondang nankin isarungkon ia sabuti tu ulu nia, songon belanda mantong nida.

Dung cukup namaradiani, jong-jong ma abang adisian jugukan niai songoni abang tondang, ida ia tajak nia na utiop do, ipangido ia inda ulehen, maloja ia mangelek na inda juo ulehen, jadi ikojar ia, marlojong ma au tu lombang laos mangambukkon tajakon, pala inda tarimbang borat nibadan di lerengon unggal ma au tu bibir ni tajak i. Dosek masubak, borak-borak ma abang tondang mangaligi daro namabugangi ibibirku, ma mio ayah. "Tobang, tobang, ligima anggi" ipayakkon ayah tajak niai langsung ilojong ia tu lombang mangangkat au natangis-tangis manjorit-jorit " ole ayah, inda ayah, " guru-gur doma odok ni ayah mangaligi au, langsung ibuka ia sabatang sigaret nia, i dalpakkon ma tu bibir namabugangi, iompa umak ma, baru mulak tu huta, padahal kadangan naso ibuka dope, songoni tes tar samangkuk dope na urak,  toap pe ngape sadia, tai amilasan niari mambaen mudar naso ra pantan. Akhirna mulak mattak karejo demi anak. ima asal-usulna so martias bibirku.

Ngapola gok nauboto waktu menek di bagas pusakoi, pindah ma ami tu bariba dalan, bagas nagodang martaruma kaco tingkapna, dua kamarna mardapur lapang buse luarna, abang bayo kehe sikola SD, umak mangomo tu saba ni halak dohot ayah, kadang ayah kehe manjalaki karejo nalain, abang hadi di pesantren dalan lidang, au dohot sie kodir dikurung di bilik jolo, arana musim sigotap ulu, anggo inda mulak sikola abang bayo inda tola kaluar. Sikodir memang parorotonku tai baen na ikurungi di bilik, uanjak tangis indadong mam begena malah sikodir do tarsonggot sian anggunan niai naikobetkon tu tali naitambat ni ayah tu upangi. Rap tangis ma ami manokok-nokok pintu kamar, iburbar pe soadong mambegena harani alak di banjari markean tukarejona be, natangisi ma mio-mio sambi marende nada tangis nai " umak,,,oumaaaakkkkk, aya...... abang adiiiii, nenek jamburrrr... Bukaaaa, abang bayoooo. Sude namar holong niroa ibuat ma mulak roanai, so dibuka pintu bilik, tai biama le baya baenon, memang naso adong alak di banjari songoni nalewat. Dikuburani doma nagok alak, ipe amana sombong-sombong.

Inda marimbar sanga aha dalan ni epeng sude di karejoon ayah, marjagal boja pe jungada waktu musimna, dibagas tingkap kacoon dokonon boja doma satonga luar ni bagason, alak pe marroanma tubagas inda mar namantak baen namurai buse argana memang hargana sesuai kiloan parbiji. pala musim buse manajak saba nakehe me ayah mar sulu bolut oban lampu tarongkengna so torang disabaan, harana borngin dabo ning ayah markaluaran die boluti sian lubanag nai gon bustaki natinggal manjomputi doma, lobi sa ember be bagian ni alak ayah dohot dongan-dongan nia nasaudurani. Marayak kotu subuh ro mai ayah, ibusema karejoon ni umak mambituaina pala bolut natar tampul sangape napingsan, isale mei di tataringi marbual sude bagas pambaen ni timbus sabut arambir naioban sian sabaan pala marculok.

Indape nagonop etongan ni bulan,  Ipajong-jong ayah ma bagas papan batang niarambir naisingso niayah batang niarambir namalosok mangolu mabiar mate. Sampe siap ditolongi umak ma mangaleheni tarup rumbio. Pindah ma buse tu bagas panggung dilambung tobang ani, marsumbur parik nai bope tano na mangongkos.

Abang hadi topet mulak sian dalan lidang, mangukir lobi-lobi panggotapan papan nibagasi giot keterampilan ni Abang bayo saat i makalas dua giot ioban tu sikola, logo tut wuri handayani ma di ukirna. au dohot sie kodir inda pe sikola.

Pala Manyogot dope ari roma kakak juli mangalap au. Ia buse doma paridina, inda be alak kakak lenni dohot siti songon nasakalii, dung maridi , marbadak, latek surina dungi i sulangan me managan isendokan di alamani. Pala manyogot attong ma borak-borak mai tobang ani manyuru kakak anso di alap anggi niaon mandokon au "patibu alap sie gendut paridi jolo". pala anttong roma nattulang pataru nasi goreng soadong sarapan nami dohot abang bayo dompak sokehe ia sikola.

Disada ari roma tobang alak lai gon manyupir truk maroban silua tarutung. Ipio tobang adaboru ma au "oooo gendut jodo tarutung, roho tuson indon ioban tobang mu jo" padahal mai pataru ma di ami tu bagas tai lek ipio dope au, memang antong nataboan tarutung nai lunak buse hurangan doma irasa, baba mamarsalutap songoni tangan idilatan dope, ben nai ambukon lampak nai tu sampingi. Adong ma sada danak ke tusampingi mandilati lampak nitarutung nai ambukkon ni kakak juli, pala pas tobang kaluar gon dapur ida ia ma danaki langsung i soro ia " oooooooo le gendut anak nisi ishak, suang naso ilehen dibabami tarutungi, idilati  hodope lappak nai  i parikon, ala leh mang anggoau matemada ibaen congokmi" baen gogona sora ni tobang marsiligi doma alak nai banjari rap martata. Maklumbe baen najop i roha nalai tu au.

Ari jum'at poken disigalangan topet ma ayah marjagal lasiak di taon 1993 dompak au marumur opat taon jadi sikodir uparorot "dompak so mulak Si bayo gon sikola ulang itinggalkon bagason, itangko alak naron anggi mi, so itabusi umak naron jo silua" mang olo on nacopatan, tai dung kehe umak si kodir pe modom, ukunci dibagasan baru kehe tu pokenan, harana maleleng tu urasoi umak gon poken so ro, marsinglit-singlet marsalaor pendek mardalan tupoken hara antong donok do manopi-nopi ma au mardalan, pas waktu manyiborang upio ma parbecak nautandai so isiborangkonna au.

" Ise dongan mu tuson, motor nagok itung motori iba boto mate die, iji langa ayah mu"

"Ison, nikku

Topet ma ida parbecak on umak mamili-mili kantang ipioon na ma umak

" O sianu, indon sie gendut"

Tarsonggot mada umak maligi au ro tupoken, sanga ise donganku. Dung maartarimo kasi umak tupokeni di iring ma au mamili sanga aha giotku dipokenan.

"Aha do jo ayah"

Sagalo panganon dohot mainan itawarkon totop inda dong na hagiot. Laos ioban ma au dohot ayah, uida ma najegesan narara-rara, nagohokan satembok murah buse.

"Umak ima jau"

"Aha dei amang"

"Indi nararai"

" Ijia"

Umak pe bingung sanga aha naupangidoi,Pas ubuat sabiji.

"On bo umak"

" Ele baya amang tomat do dabo on, tu gule do ibaenon"

" Ido jau"

"Baen ma inang sa tembok tomaton, onma dongan hagiot nia sainggok ni panganon di pokenon" ning umak tu parjagali

" Ido dabo inang somok-mok anak taon non" ning parrengge2i

Ibungkus ma tupalastik tomaton Laos pataru au tu ayah, upangan ma tomat na raraon jinjing sapalastik.

" On ma dongan giot nia di pokenon" ning umak tu ayah

" Ise do baya maroban ankkon tupokenon, tai nangkin natinggal do di bagas" isapai ayah umak

" Ro ia dongan sada-sadaia, ben na nida sie aha do au nangkin, ia do manyiborangkon naon" iaduon umak.

" Oowh... Pajolo ma hamu Mulak songoni ngot buse naron danaki ibagasan ngadong paturena" isuru ayah umak so cepat mulak tubagas mangaligi sie kodir nau tinggalkon nakkin.

Ayah memang inda jungada loja manjalaki balanjo nami. Pala borngin lek namarsulu ma karejo ni ayah, soadong jagalon ni umak tu poken jong-jong. Sakali dope au ipadohot umak marjagal, najop ma rohangku, nasonangma. Sude alak marsapa tu umak "anak ta doon dongan" ning parrengge-rengge dongan-dongan ni umak manyogot ni arion.

Jarang do ayah dapot di bagas anggo dung rap mangan manyogot. Sahinggo pas giot lahir si irham, umak marun ialap ma bidan isuru tobang  ma au dohot abang bayo manjalaki ayah tu lopoan, kehe ma ami sian parik masin torus tu lopo-lopo. Lek inda pasuo, pala ro ami tubagas ma disi ma rupana ayah, anggi nami pe lahir ima sie irhamuddin efendi rangkuti 1995.

jop niroha nganatar dokkon be dung lahir si irham.umak-umak marroan mangaligi laos maroban dahnaon dot piramanuk, pamborgo-borgoi goarna. songoni muse parompa, koum-koum marsisudurkon lehenanna tu umak. margonti-gonti mangompa ise naro, ompa, cium,baru ipasongon-songo.
"owi na ganteng madaon, bontar muse... songon ompungna, songon ayahna, songon uwakna," idokon buse ma songon ompungna, ayahna, na gidikna dabo idokon nabontar songon ayah na. andigan niari debaya ayah bontar, dung dong marningot au lek nalomlom ma ayah. adong-adong sajo do ulala alakon. taintong olo, goarna pe baba nihalak, ngatarurus dai, ma ubin tu pe iba naso tola dei, naponting mai oban kalai dahanon bubung doma antong goni i, piramanuk pe bahat doma di kayani, na jop sajo ma roa nami dohot abang bayo mambolgangna, nai sajo doma alilian nami sapokenon.

mahdiantamintangkuti@gmail.com CERBUNG BELUM DI EDIT  mahdiantaminrangkuti.blogspot.com