CERPEN KAMPUNG-KAMPUNG [ SADARI MANGALOMANG

LOMANG JAMBUR PADANG MATINGGI

Halak baya madung mamar sandar be bulu lomangna di dinding pamispisan ni bagas na be, iba nasodong dope bage na aha. idia doma dapot modal naget mangalomamngon, batang ni bulu niba pe soadong tampulon, manabusi ngatar baen, takok roai ipainte masongoni lobi-lobi tumba ni ombaron sasada, sanga gotap-gotap nai pe iamot masongoni, daripada manabusi bulu. ngana ilehen ni alaki dabo be mangido bulu di gurison nalai, sude madung jadi epeng. najolo le baya ilehen kalak dope mangido bulu sanga get sajia bahat pe jiba, inda hum get pangalomang, pajong-jong bagas garigit pe lidang ilehen kalak nai, sanga dontong idokonia irora sodu bulu nasakobuni ben sohotna di gurison nia urang songon parbeguan nida, oni manjagoon ulang adong disi ulok. anggo sannari hum naget gala ni irean pe jiba nganadapot mangido apalagi mantong songonon laku ni bulu lomang. namanabusi doma sude.

sangajo nahebat ma tabo nilomangi tele, porluan doma manabusi sippulut kontan, marsali pe nian di baen juo dei. tai anggo danon si pultakkonon samatua namarutang tu lopoan. goso do boto iba ibaen lomangon, sira nasodong dope, manjalaki tanaon, arambir, adaran, odong ni bulung pisang dope tu kobun nialakan, mangido doba, palanga dilehen ipainte buse lobi-lobi bulung ni ombari anso lek lalu bope namar tolu tumba. jabat ngamangalomang iba, nadangol tu mada dongan nasib niba. iba ma nalayas na di huataon. oni aha buse ma obanon niba manjalang arrayo tusimatobang niba. pinomat jingjing satumba lomang niba pala kehe manjalang ari rayo. anggo ngada na ra buse dei ona obari iba di bagas godang.

ila muse mada roa, lukap-lakip doma bab niba mandaisi korotan lomang nialaki tu kuah rondang naiparobani ni koum-koumon, tai lomang niba nganida alak. nasngkal tu maibai jabat ngamaila. hum gara-gara nilomang, bope nabaru marsijalangan arrayo manyogoti, mandorik-dorik marsimoofan, na ra dei sarsar mulakan gara-gara sangkorot lomang. angkentong ima ben tabo ni lomangon.

kadang lek marpikir do roha. ahama ning roha somangalomang bagei, gonjia ma dapot dalil ni i. oni angkon namar dalil doma langa so mangadar lomang naso binoto niama baya ngadong bulu lomang di gurun sahara, bunga duri maia nagok disi palanga kurma doma. oni ijia buse mantong dapot kalai adaran nilomang, nganadong disi buse ayu jalak-jalak pala angkon nakehe buse ma alak arab i tu topi lautan pala na adong, bele-bela marobanna di paraui matar langka-langkai daran nai, jabat tar langkai adaran nai muta mai lomang nai, ngatabo daina, namajobu tu ma dongan alak arab mangalomang di itaon maia na tabo dai ni lomang. nagkon majolo tu arab, di jakartaan napayahan de dapot lomang, pala dapot pe nagodangan dei arga ni lomang sangkorot tipis muse dari pada arga ni sere sapartambuan. (MR)